TAMAgotchi

tama-1

تذكرون Tamagotchi ؟
اللعبة الإلكترونية الصغيرة اللي طاحو فيها الصغار من سنوات طووووويلة… هالكلام ما اذكر متى كان تحديدا بس أيام ماكنت بالمدرسة 🙂 يعني زمان أوي
لعبة صغيرة مره تنشال معاك في أي مكان.. وفكرتها إنك تربي كائن حي من وقت ولادته وتتولى حتى تسميته وتهتم في أكله / تطبيبه في حال صحته تأثرت / تلعبه / تنظفه وغيرها من الخصائص اللي ممكن تزيد لو كان فيه اتصال ولعب مشترك مع تاماقوتشي من لعبة ثانية في نفس المكان

tama-2

المهم إنه اخواني بعد طاحو فيها هذاك الوقت..
ومن بعد مانزلت أول نسخة من اللعبة استمرت الشركة في تطويرها ومؤخرا بس نزلت النسخة الخامسة منها

tama-3الجدير بالذكر إني تهيجت عندي المشاعر للعبة وقت ماشفت صور النسخة الأخيرة على الإنترنت
ورحت ذكرت أختي في تاماقوتشيتها اللي هجرتها وحسستها بتأنيب الضمير
وفعلا جبت نتيجة معها وبدت تربي فيه من جديد
خلال هالفترة بسيطة انتحرو من عندها 3 تاماقوتشيات..
(هو لما يموت تقدر ترجع وتعيد اللعب بواحد ثاني)

tama-4(الأول): يابعد حيي هذاك.. مات من كثر ماهو دب لأن وزنه كان 99 (وهو أكثر وزن مسموح في النسخة اللي عندها) وعمره اظن كان 4 سنوات.. كنت اقولها حرام عليك ترا بيموت لا تأكلينه ولعبيه (لأن اللعب ينحف) وتقول وش اسوي لصديقاتي لما تروح للمدرسة كل وحده تقعد تزرط فيه

tama-5(الثاني): نسيت سبب الوفاة.. لكن اظن قلة اهتمام.. لأنه برضو وصل لعمر حليو يمكن 8-9 لكن ماتراقبه باستمرار فـ يروح يجوع / يمرض / يوصخ نفسه.. ولا أحد عنده

الثالث: جتني من أولها وقالت لي استلميه لين يصير عمره 12 زهقت من اني اطورهم ويموتون واذا تطور عطيني اياه.. وطبعا انا ياحياتي انواع اللي اهتم فيه وحتى لما اطلع آخذه معاي وكان وقتها تمام مره… ومره وانا طالعه فجأة طلعت إشارة اللعبة… وسألني: lonely ؟ قلت له ايه.. راح جاب له صديقه (التاماقوتشي) وجابو ولد بالحلال 🙂 وصار عندها بيبي مع التاماقوتشي الأساسي… ومن الوناسه دقيت عليها علمته اني جبت لها بيبي.. وطلعت الذكية دايم يسألها نفس السؤال وتقوله لا.. تقول أخاف انه يبي يروح ولا شي لوووول.. المهم هي من البزة بالوليد الصغير قررت ترجع تتبنى التاماقوتشي عندها…. وكلها يومين وفطسوا الاثنين 😐

والآن هي بطلت تلعب فيه …

وأنا قلت في نفسي وشو له أقعد أربي في عيال الناس خليني بس أجيب لي “وليد” لي وأربيه بنفسي… وفعلا طلبت لي واحد من النسخة الجديدة Familitchini وهي فيها أب وأم وبيبي اظن يتربون مع بعض… والآن أنتظر وصول وليدي الجديد.. وبرجع أوريكم اياه إن شاء الله إذا وصل بالسلامة 🙂

Advertisements

32 تعليق to “TAMAgotchi”

  1. مـاهيتاب Says:

    .
    .

    ذكريات !
    ما أدري هي اللعبة نفسها أو لا اللي كانت عندي
    تقريبا بصف خامس/ سادس ابتدائي
    من كم أسبوع بس أقول لأختي تتوقعين موجودة إلى الآن..
    اللي ذكرني فيها.. شريط لعبة عند أختي الصغننة بـ “القيم بوي”
    قاعدة تربي كلب, و لعبة ثانية تربي قطة
    بس هذولا متطورين.. فيه تلعبينهم/ تتسوقين لهم / تشرين أكثر من كلب, قطة..
    و تغيرين بيوتهم.. و هكذا..

    عموما اللعبة اللي كانت عندي.. تقريبا على حسب ذاكرتي إنها نفس اللي في الصورة
    و لونها أحمر..
    ناسية اسمها.. بس أذكر إنه صعب شوي نطقه..

    توني أدري إنه ممكن يطول بالحياة + يتزوج غ1

    أذكر إنه لما شريته كان معروف عندي إنه مدة قصيرة و يموت..
    طبعا مات غير مأسوف عليه ض1
    ما حبيته و ما كانت أبدا ممتعة..
    اللي أذكره إنه غالبا نايم + أعطيه أكل ..
    و اللعبة غير ملونة : (
    كيف مات و متى.. ناسية

    /

    إذا وصلت اللعبة الجديدة لك.. علميني عن تفاصيلها
    هل صدق ممكن أحبها ض1
    أو تكون هدية النجاح لأخواتي الصغننات 😀

    يوصل بالسلامة, و يتربى بعزك, و يكون بار فيك :p

    .
    .

  2. Ghada Says:

    وش هالحنين المشترك؟
    شفت شي يشبها فـ تويز ار اص اظن! نسيت وين
    المهم بغيت اخذ لي واحد بس مدري ليه ترددت 😦
    سوسو انتي من وين بـ تجيبينه؟ ابي اجيب زيك >ربي ولدك اول :لول:

  3. توته Says:

    بليز ودي اعرف من وين تجيبون اللعبه انا الحين قاعده اشوفها في سواني محل في المجمعات طيب ممكن اسالك من وين تجيبه لاني ودي اشتري واحد لانو الي في الحل غيييييييييير

  4. ablaj Says:

    أبشركم وصلو عيالي 🙂

    هذي صورة تاماقوتشيتي (نفس هاللون والنسخة بالضبط.. لأني احترت وش أختار لون.. آخر شي سويته اني عطيت اخوي مجموعة يمكن 5 او 6 قلت له اختر لي وحده من هذولي وريحني من المهمة)

    تقريبا صار لها عندي يمكن 5 أيام
    امممم انا طلبت النسخة الخامسه… كصور وطريقة عرض ونوعية الشاشة نفس القديمات تماما يعني ابيض واسود والإضاءة نوعا ما سيئة
    لكن تطورت فيها شغلات كثيرة جدا عن آخر علمي فيها وتطورات تعتبر حلوه يعني كثرت الخيارات في كل شي وصار في امكانية للربط بالكمبيوتر.. وفي امكانية لشراء عن طريق جمع فلوس وقت ماتلعب.. عدد الألعاب زادت.. وفيه تغيرات تحصل بتغير الأعمار.. حاليا قاعده أربي 3 في نفس الوقت (في مقياس لقوة ترابط عائلتك على فكره) وأطفالي هم الآن في عمر المراهقة 🙂 ولما يصيرون بالغين أقدر أزوج واحد منهم سواءا من خلال قناة “الديتينق” في نفس اللعبة او اني ازوجه بواحد من لعبة ثانية.. اللعبة نوعا ما مافيها هذاك الحماس ورتمها ثابت شوي.. لكن عن نفسي أحبها كثير لأن فيها ارتباط وفيها مسؤولية وصدق تحس انهم عيالك لوووووول.. الحمدلله إلى الآن مبسوطة بلعبتي

    /

    ( هتوبه )
    أعتقد انها نفس اللعبة
    وحطيت ملخص عنها فوق ان شاء الله يفيدك ولو محتاجه معلومات زيادة علميني..
    وبالنسبة للعمر هو مكتوب عليها ماتنفع لأقل من 8 سنوات
    وفعلا أشوف انه هالاصدار بالذات لأنه تطور كثير مو مناسب لصغار وبيطفشون منه يمكن… يعني انا اقول 10 سنوات وفوق عشان يقدرون يخشون في جو اللعبة

    /

    ( غدو )
    شفتي كيف الصداقة ض1 نشتاق لنفس الاشياء مع بعض
    وصحيح انا برضو شفت النسخه الخامسه في (توز آر آس) لكن ما اشتريتها من هنا لأن الألوان المعروضة كانت مره شوية ولا اعجبتني.. فـ طلبت لي وحده من أمريكا.. لو تبين يمديني أجيب لك أو تلقطين لك عالماشي من تويز آر أس أسرع

    /

    ( توته )
    لو انتي في السعودية راح تلقينها في محلات (تويز آر أس) أكيد
    واتوقع برضو في محلات الألعاب الكبيرة أو حتى محلات الكمبيوتر دايم يجيبون هالشغلات
    أنا طلبتها من أمريكا لكن تلقينها هنا وأسعارها حلوه

  5. توته Says:

    شكرا لكablaj انا الحين اشتريت زي الي تقول عنها من تويزر اص عندي ثلاث اولا زوجتهم 3 مرات انا الحين مهتم فيهم

  6. توته Says:

    ولعبة تاما قوتشي الها موقع اا تبون اعطيكم (http://www.tamagotchieurope.com/)تفضلوا هذا الموقع

  7. توته Says:

    ablaj انت كم عمرك بس حبيت اعرف عشان اذا كنت كبير اونص نص لانو الكبار يتمسخرون علي ويقول انتي صغيره عشان تلعبي فيها

    بس ممكن اعرف عمرك
    ؟؟؟؟؟؟؟

  8. ablaj Says:

    (توته)

    هلا بك.. وشكرا على تواجدك ومرورك
    وماعرفت انت ولد او بنت بس مو مشكلة
    وماشاء الله زواج 3 مرات شكلك من جد معطيهم وقت كثير
    أنا زوجتهم مره بعدين قلت آخذ بريك منهم وسفرتهم 🙂

    وبالنسبة لعمري خخخخخخخخخ أكيد أكبر منك وماعليك من اللي يقولون للصغار
    اهم شي توسع صدرك 🙂

  9. غاليه Says:

    التاما قوتشي لعبه قديييييمه والبطاريه حقتها كل ما اشتري وافرح القاها مخلصه بس اخسر فلوسي عشانها وهي اسخف لعبه على وجه الارض معليش بس مو اهانه بس شكرا عالموضوع شوقتيني لها اني اربيها بس عاااادي خلك ايزي ياعزيزي ربيت عشره وزوجتهم عشرين ويسلموووو

    تقبلي مروري

  10. غاليه Says:

    التاما قوتشي لعبه قديييييمه والبطاريه حقتها كل ما اشتري وافرح القاها مخلصه بس اخسر فلوسي عشانها وهي اسخف لعبه على وجه الارض معليش بس مو اهانه بس شكرا عالموضوع شوقتيني لها اني اربيها بس عاااادي خلك ايزي ياعزيزي ربيت عشره وزوجتهم عشرين ويسلموووو
    وو
    تقبلي مروري

  11. سارونه Says:

    شكرا شكرا شكرا شكرا وموضوعك عجبني

  12. زوزو Says:

    هاي ممكن اتقولون لي امنين اشتريه انه من السعوديه من الاحساء ابغى اعرف امنين اشتريه وبكم سعراه استنكم

  13. ablaj Says:

    (غالية)
    اممم غريبة حكاية البطارية لأنها تقعد فوق السنة ولا تخلص
    يمكن كان عندك مشكلة او شي
    عموما حياك ربي وعادي مو كل الناس يحبونها
    وحتى أنا مو كل الأوقات أحبها أو ألعبها
    صار لي شهور مسفرة عائلتي ولسه مافكرت أرجعهم لوووول

    (سارونة)
    شكرا لك
    وحياك ربي دائما

    (زوزو)
    ما أعرف عن الاحساء
    لكن لو عندكم محلات ألعاب Toy’s r us أكيد بتلقينها عندهم
    لو ماكانت عندكم أتوقع بتلقينها في محلات الألعاب الكبيرة أو حتى محلات ألعاب الكمبيوتر والالكترونيات
    والجيل الجديد منها سعره في السعودية تقريبا 100 ريال ممكن تعلى أو تنزل شوي حسب المحل
    موفقه زوزو

  14. PINKI GIRL Says:

    بصراحه مشكورة اختي انا اشتريته من كم يوم هو جا معاه تعليقه فيها باسورد حق النت دخلت على موقعهم لاكن مادري وين احطه موقعهم غير وازم اسجل سجلت بس ماجاني رد انا حقي النسخة السادسة ياريد تردين علي ياختي العزيزة وراح اكون شاكرة لكي
    وياريت تقوليلنا يعني قد ايش ناكله اوقد ايش المفروض ينام ونصايح وكذه يعني اوكي باي

  15. PINKI GIRL Says:

    ارجوكم اريد حل او رد سريع

  16. رهوفه Says:

    هااااااي عندي اثنين منهم النسخه القديمه الي تربين واحد بس ونسخه فيها ثلاثه ونسخه الثلاثه حقهم على شكل بيت والقديم حقه فيه كره صغيره انكسرت>>>عاد ما سلم من كثر ما ينرمي

    المهم ممكن الباسورد حق النسخه القديمه وكيف اشبك التاماقوتشي على موقعهم؟؟
    وكيف اقدر ازوجهم على نسخة الثلاثه؟؟؟؟؟
    و هل هناك لزوم عشان اشبكهم مع ثاني عشان يتزوجون؟؟؟

    اتمنى اني ما كثرت اسألتي لكن احيانا اطفش منه بس تقعد تتمشى ما تسوي شي واخر سوأل كم يسير عمرها عشان تتزوج وهل ممكن اني اشبك مع تاماقوتشي ثاني عن طريق النت؟؟؟؟؟

  17. ملامح ناعمه Says:

    أنا ودي أشتريها لاكن ماعرف وين يبوعنها

  18. ملامح ناعمه Says:

    ردو تكفون

  19. ablaj Says:

    سوري بس كنت موقفه المدونة فترة
    شكرا pinky girl & رهوفه & ملامح
    ،
    ملامح.. تحصلينه في toy’s ‘r us

  20. احمد المومني Says:

    السلام عليكم ان بدي اشتري وحده من الاردن بس ما لقيت ورحت على السعوديه عشان نعمل عمره ودورت كمان ما لقيت بس الي يعرف وين الاقي بالاردن يقول احنا ما عندنا تويز ار اص ممكن اني الاقيه بكارفور ? في الي ابن عمي في الامارات ابو ضبي بالعين تحديد عندهم تويز ار اص ممكن انه يلاقي فيه tamagotchi ولا لا بدي مساعدتكم ضروري باي

  21. ablaj Says:

    وعليكم السلام ورحمة الله وبركاته

    والله ياأحمد ما اعرف عن الأردن بس أتوقع تحصله في محلات الألعاب الكبيرة في أي مكان
    يعني سواءا في الأردن او الامارات اكيد تلقاه بس اسأل عن في المحلات المعروفة الكبيرة وضروري يكونون جايبين منه
    أو برضو المحلات اللي تبيع ألعاب الفيديو (الكمبيوتر) أتوقع موجود عندها نفس الشي

    أتمنى لك التوفيق وانك تحصله بأسرع وقت.. لو كنت قريب كنت أعطيتك اللي عندي

  22. احمد المومني Says:

    شكرن لك يا ablaj على مشاركتك ورح ادور مثل ما حكيت وسلامه خيرك مشكور

  23. احمد المومني Says:

    السلام عليكم بس بدي اسئل كم سعرها العبه لانه كل واحد يقلي سعر كم سعرها يلي اشتريتوها وشكرا

  24. ablaj Says:

    العفو ياأحمد
    وسعرها أول مانزلت كان بحدود الـ 25 دولار
    لكن أتوقع نزل شوي سعرها مع الوقت

  25. احمد المومني Says:

    يعطيك العافيه يا ablaj مشكور

  26. عاشق التاماغوتشي* Says:

    لو سمحتي كيف اروح قناة الديتينق عشان ابغى ازوج حقي منها * امانة ردي

  27. عاشق التاماغوتشي* Says:

    انا جديد في تربية التاماغوتشي ^ــ^ )=d

  28. عاشق التاماغوتشي* Says:

    الوووووووو

  29. ablaj Says:

    عاشق لازم تنتظر لما يكبر ويصير في عمر زواج بعدين هم يعرضون عليك الخيار

  30. YA LBA 8LBY Says:

    السلام علييكًم . ,

    لو سمحتي اختتتي انا ابييها من زمان بس ما لقييتها !~

    ولو تعرفين من وين احصلها ب [ الجوف ]

    وشكرآ ~

  31. ablaj Says:

    وعليكم السﻻم

    والله ما أعرف وين في الجوف
    بس أكيد عن محﻻت اﻷلعاب الكبيرة أو محﻻت الالكترونيات
    أو تجيبينها من الرياض
    أو تطلبين من الانترنت
    هذي كل الطرق المتاحة في الحياة 🙂

  32. لوسي Says:

    انا مررررة احبها +انا في المدينه المنورة

    دايما اشتريها من محل اسمه كوكب الالعاب كنت اشتريها بـ 100 وفووق

    وامس رحت عالية المدينه ورحت تويز ار اس لقيت اخر اصدار وعليه تخفيض كان سعره

    69 صارت ب 19 انا ما صدقت الين الحين ^^

    و انا مني عارفه لها في عندي ثلاث نونوات ليش ..؟

    اتمنى تردي 🙂

التعليقات مغلقة.


%d مدونون معجبون بهذه: